Leanfaidh an grúpa Stádas ar aghaidh lena bhfeachtas teanga oifigiúil de chuid an Aontais Eorpaigh a dhéanamh den Ghaeilge inniu, tráth a mbuailfidh toscaireacht leis an Aire sa Roinn Gnóthaí Pobail, Tuaithe agus Gaeltachta, Éamon Ó Cuív.
Dúirt urlabhraí thar ceann an ghrúpa agus príomhfheidhmeannach Chonradh na Gaeilge, Aoife Ní Scolaí, gur deis a bhí sa chruinniú "ar deireadh suí síos le hurlabhraí an Rialtais" agus fáil amach cad iad na spriocanna a bhí ag an Rialtas i dtaobh na Gaeilge san Eoraip.
Ní raibh deireadh leis an fheachtas, a dúirt Ní Scolaí, in ainneoin gur thug an Taoiseach le fios sa Dáil nárbh fhéidir stádas oifigiúil oibre a thabhairt don Ghaeilge.
Cuireadh "míchomhairle" ar an Taoiseach, a dúirt sí, agus dá bhfaigheadh sé eolas cruinn, ní raibh amhras uirthi ach go dtacódh sé leis an fheachtas.
Ní bheadh Stádas sásta le rud ar bith ach stádas oifigiúil a fháil:
"Cén fáth a bhfuil muid ag caint ar rud leath bealaigh?"